Biyernes, Hunyo 17, 2011

Ngayong Walang Maisulat Na Tula

Kailangan kong sisirin
ang kailaliman
nitong aking isipan.
Hanapin ang mga katagang
matagal ng nakahimlay
sa aking katauhan.
Pakinggan-
Ang mga tanong sa kawalan
na hanggang sa ngayon
wala paring kasagutan.
Ito’y aking isusulat,
sa pag-asang hihilom
ang iniwang mga sugat;
at unti-unti...
Paliliguan ng luha
ang bawat linyang
iniukit sa gunita.
Hahayaan kong tunawin
at lisanin muli
ng aking tula.


Martes, Hunyo 14, 2011

Pagtakas

Bukas...
Lalayo tayo,
sa nakalipas.

Bukas...
Pagsapit ng ala-singko,
Tatakbo tayo.
Tatakas.


Bukas...
Lilipad tayo palayo ng Ortigas.
Mamamasyal sa Stop-and-Shop.
At bukas,
Sa tuktok ng pinakamataas
na billboard sa Edsa -
Doon tayo magpapalipas ng oras.
Magkayakap.


Bukas...
Magliliyab ang ating bakas.
Mag-aapoy muli -
ang na-abo nating pangarap.
At bukas,
Sa ating pagtakas,
mapapapikit ang lahat.
Mapapaisip - kung paano tayo
nakatawid ng Crossing.


Bukas...
ang walang katapusang
pagtakas.

Sabado, Hunyo 11, 2011