Ginahasa ng aming mga pangarap
Ang nakakaakit mong dalampasigan.
Sinabuyan namin ng burak ang dagat
makamtan lamang ang iyong yaman
Na magtutupad sa aming kahibangan
Binusabos ng aming mga pangarap
Ang mala paraiso mong kagandahan.
Naging abo ang mga puno’t halaman
Makamtan lamang pekeng kasaganahan
Kahit habam buhay na pagdurusahan
Sinilaban ng aming mga pangarap
Sariwang hanging sayo lang malalanghap.
Ginapos sa usok iyong kalangitan
Matamasa lamang ang kaginhawaan
Kahit kapalit ay aming katapusan.
Kalikasan, sa bingit ng kamatayan
Pagdurusa mo iyo sanang wakasan.
Parusahan mo kaming makasalanan
Upang di na muling makapanira pa
Tuluyang maligtas ka sa aking tula.
Walang komento:
Mag-post ng isang Komento